تاغوا طراجيات المغرب

 تاغوا هو وحد الشاطئ لي حدا شاطئ لكزيرة . كاين ناس بزاف كيخلطو بين تاغوا ولكزيرة. هاد تاغوا معروفة بلقوس تعها لي حسن من قوس لكزيرة لكن قوس لكزيرة اشهر منو حيث جا فمنطقة مشهورة وعندها طريق مقارنة مع قوس لكزيرة.

تاغوا منطقة كالم مفيهاش بنادم بزاف وامكن لك تخيم فيها بلا صداع بلا منع بلا والو حيث قليل لي كيوصلها حيث مفيهاش طريق باينة بحال لكزيرة.

باش توصل لتاغوا عندك جوج طرقان.

من اكادير تشد لكار لسيدي افني ب 50 او 60 درهم

لكار كيخرج مع 4 دلعشية سميتو اسفار امودو وكاين كار اخر سميتو باب السلامة حتى هو نفس الثمن . كتقطع لسيدي افني وقوله احطك فلكزيرة غتوصل مع 7 ولا 8 د ليل غيهحط فطريق د لكزيرة تهبط على رجل وحد كيلومتر وسول شي وحد على طريق تاغوا.بعيدة على لكزيرة بشي كيلومتر تقريبا.

كاين حل تاني تجي لتزنيت وتركب فطوبيس بحوالي 20 ولا 25 درهم حتى لكزيرة او سول شي حد على اقرب طريق لتاغوا وهبط. كاع الا غادي تلف هبط فلكزيرة وسول على تاغو راه قريبة

اما الا كنتي جاي من لجنوب اقرب بلاصة تركب من كلميم ل سيدي افني ب 25 درهم ومن سيدي افني لكزيرة ب 6 درهم فطوبيس

الا غادي تخيم ف تاغوا مسموح تخيم مكاين لي اهضر معك غير دي معك لماكلة تاعك ولماء من سيدي افني ولا تقدا من فين ما جيتي اما لماء خصك تمشي حتى لكزيرة تعمر لماء حيت مكاينش فتاغوا

الانشطة لي تقدر تدير فتاغوا هو السباحة والصيد. السباحة من الاحسن تمشي جيهة ليمنى بحال الا غادي جيهت لكزيرة حيث شاطئ تاغوا صعيب تعوم فيه حيث بحر واعر بزاف. اما الصيد طلع من فوق القوس تاع تاغوا وتبع طريق وصيد مع راسك وبصحة والراحة

اي معلومة حتاجيتوها خليو تعليق ولا راسلوني نجوبكم ولا لي عندو شي اظافة اخليه فتعاليق نستافدو كامل